TULILLA - DOLLAGÁTTIS: Neahttačájáhus sámegirjjálašvuođa jahkeloguin.


Suoma sápmelaš erenomášgirjerádju lea doaibmán 30 jagi. Okta girjerádjosa guovddáš bargguin lea háhkat sámečoakkáldahkii sámegielat ja sámefáddát girjjálašvuođa ja Suomas almmustuvvan girjjálašvuođas buot girjjiid. Suoma sámegielat leat davvisámegiella, anáraš- ja nuortalašgiella.

Sámečoakkáldat čoggogođii juo 1970-logus, oassin Roavvenjárgga gávpotgirjerádjosa Lappi-ossodaga girjjiin. Oahpahusministeriija mieđihii ruhtadeami sápmelaš erenomášgirjerádjosii jagis 1990.

Ávvočájáhus Tulilla- Dollagáttis muitala sápmelaš čáppagirjjálašvuođa ovdáneami njálmmálaš muitalan- ja juoiganárbevierus girjjálašvuohtan ja eará girjjálašvuođa jovkui. Čájáhus álgá 1600-logus ja ovdána kronologalaččat gitta 2020-logu rádjái. Čájáhusa deaddu lea 1990-2020 jahkeloguin. Lassin čájáhus buktá ovdán guovddáš jorgalemiid ja antologaid sihke girjjálašvuođa dutkamuša ja historjjá.

Sámečoakkáldaga čáppagirjjálašvuođa oasi ja čoggoma govvejuvvo maid loguin.

Neahttačájáhus atná ávkin sámegirjjálašvuođa Kirjasampo-siidduid. Lohkandiploma-siidduide leat čohkken mánáid- ja nuoraidgirjjálašvuođa davvisámegillii, anáraš- ja nuortalašgilli. Dain siidduin leat dieđut girječálliin ja girjjiid sisdoaluin. Fierbmečájáhusa girjjit leat liŋgejuvvon Lappi girjerádjosa Finna Gávdnosis –dieđuide. Finnas gávnnat maid oanehis čilgehusaid girjjiid sisdoaluin.

Sápmelaš čáppagirjjálašvuođa čájáhus lea leamašan oaidninláhkái Lappi-ossodagas, geasset 2020. Čájáhusa plánenmuttus juo mearriduvvui, ahte čájáhus sirdojuvvo maid nehttii, vuoi čájáhusa sámegirjjálašvuođa máilmmi beasaše nu viidát go vejolaš, gávdnat.